Personalmente ta agradese yo con el cosa ya escribi mi compañero el Señor Eduard Enriquez con su articulo donde ta expresa le su sentido sobre con el unpoco-unpoco desaparamiento del diaton unico dialecto el chabacano aqui na ciudad LATINO.

Na su articulo (di Enriquez) ya habla le base na su observacion que masquin donde quita ay anda, publico o privado lugar como mana opisina de govierno hasta na City Hall donde ta esta el alcalde Celso Lobregat quien ta encabesa con el preservacion del dialecto, ya puede le oye que mismo alli cuantos del mana empleyao ta conversa tagalog ya.

Tupao tambien el observacion di Enriquez que puera hende se debe, macahuya pa cunaquelios quien ta porsa conversa tagalog cay hende man amo o quell ta habla quita quebrantao y machacao pa.

Como ta habla quita que mismo el Alcalde tiene programa para el preservacion del dialecto chabacano donde cada año el llegar el Fiesta Pilar tiene pa gane ta conduci mana concurso de cantada de chabacano y este ya comensa desde el tiempo pa del Alcalde Maria Clara Lobregat es mama del presente tata del ciudad.

Pero ta mira quita dol nohay man siempre epecto. Como ya habla si Enriquez que mismo mana estudiante na diferente escuela ta porsa man conversa tagalog quebrantao y machacao pa. Si oye canaton el mana de Manila MAKAHUYA PA CAY DESMIENTE SILA MISMO HENDE AY ENTENDE COSA QUITA TA PRECURA CONVERSA O HABLA.

Este quita el resio ta oye ta man cuento tagalog quebrao y machacao el losdemas, “hali ka na MAGKAIN na tayo”, saan kayo pupunta MAGSAMA ako”, “oh baby ‘wag ka na MAG-IYAK”, y otro pa mas mana hende amo palabra ta usa. Hende mas yo coreye si cosa el amo en este mana linya cay masquin sabe man yo conversa tagalog y puede yo habla orginal pa, hende man tamen yo enteresao conversa ese dialecto cay taqui man yo na ciudad de Zamboanga.

El cosa pa aqui dol hende bonito cosa ta pasa mana compoblanos amo que mismo mi mana compañero na prensa el ta mescla tagalog el momento ay reporta o conversa sila na ere como na radio y television.

Debe el mana na prensa amo el queda modelo del publico na preservada del dialecto por medio conversa Chabacano el momento na ere.

Resyo quita ta oye con cuantos mana anunciador y reportador de radio y television ta mensiona este mana linya, ”esperanzao ay llega na ciudad el PINAKA-alto opisyal del polisia”, MALABO ya ay solve el problema……”, y mucho pa mas.

Tiene alli ta enventa pa palabra Chabacano aquel que hende puede encontra na diccionario del dialecto.

Quierre yo hace acorda que hende yo encontra con el dialecto de tagalog cay este man el diaton lenguaje nacional.

Na pero si quierre man quita conversa este lenguaje, aquel tamen amo, na propio lugar y hende tamen ay buta ya lang na basura con el chabacano como ya habla si Enriquez.

El de ustedes serbidor taman triste gayot el momento ta puede oye mana persona na ciudad ta conversa Tagalog quebrao y machacao pensando yo cay hende ay tarda o algun dia peligroso ay perde ya el diaton dialecto que ralo lang tiene na mundo.

Este tiempo masquin aquelios mana ta conversa chabacano aqui na ciudad puede quita habla que hende mas recto.

Monton alli ni nusabe mas gane cunta numero prinsipiando na numero uno hasta un mil na chabacano.

El losdemas masquin mana simple palabra nusabe mas como el YERNO, YERNA CUÑAO, CUÑADA, CUNCUÑO, CUNCUÑA, SUEGRO, SUEGRA, ENTENAO,ENTENADA y monton pa.

Tiene hasta mana color nusabe mas, nusabe si cosa el AMARILLO, SENISAO, PALIDO, y otro pa mas.

EL COSA PA ALLI UMALIN QUE EL MOMENTO OYE SILA TA CONVERSA CHABACANO AQUELIOS DE BANDA ARIBA, TA EMPESA PA SILA REH QUI REH PA CAY TIENE DAO TONO SI TAMAN CUENTO Y MANA PALABRA HONDO-HONDO. Na amo se mana verdadero chabacano noy, neng numas ustedes conesos bisya!

Manada alli ta oye quita con el mana tatay-nana ta ensiña con el diila mana diutay hijo y hija conversa tagalog enbez el chabacano. Bueno era el tagalog si amo, como ta habla quita aquel man QUEBRANTAO Y MACHACAO, macahuya!

Si serioso man el diaton govierno local para preserva con el unico dialecto chabacano, seguro este ya el tiempo para hace el propio mobemiento.

Cosa gaha si hace el consejo pasa lei donde ay requeri contodo mana persona quien ta trabaja na mana opesina de govierno o privado incluido mana establisimiento de negosio hasta mana estacion de policia para conversa chabacano, y despues conquien cuji ta viola impone pena, puera lang si tiene mana cliente o persona aquel nusabe tamen gayot conversa el diaton dialecto.

Seguro este manera ay puede gayot quita se compli el preservacion del diaton dialecto ESE SI SERIOSO QUITA CON EL PROGRAMA.

Este el rason si porque el de ustedes serbidor ya desidi para escribi mana articulo en chabacano para ayuda con el govierno local na preservacion con el diaton unico y bien bonito dialecto es el chabacano.

Bisya con el mas pa del mana articulo en chabacano el publica en este periodico.

Mientrastanto, “Pan vino-vino cada y qual su camino” Viva chabacano, Viva Mi Amable Ciudad Latino, Viva ciudad de Zamboanga!